बारा, फत्तेपुर
वैशाख २१
झण्डै एक महिनासम्म आन्दोलनरत शिक्षकहरूले विद्यालय बन्द गरी ठप्प पारेको श्री नेपाल राष्ट्रिय माध्यमिक विद्यालय, फत्तेपुर बारामा अन्ततः घरदैलो तथा भर्ना कार्यक्रम सफलता साथ सम्पन्न भएको छ। आन्दोलनको मुख्य मागहरू पूरा भएपछि विद्यालय पुनः सञ्चालनमा आएको छ र विद्यार्थी भर्ना अभियानले तिब्रता पाएको छ।
शिक्षकहरूका अनुसार, विद्यालय व्यवस्थापन समिति तथा सम्बन्धित निकायसँगको सहमतिपछि आन्दोलन अन्त्य भई विद्यालयले पठनपाठन पुनः सुरु गरेको हो। सोही सन्दर्भमा नयाँ शैक्षिक सत्रको सुरुवातसँगै घरदैलो तथा विद्यार्थी भर्ना कार्यक्रम सञ्चालन गरिएको छ।
घरदैलो कार्यक्रम अन्तर्गत विद्यालयका सम्पूर्ण शिक्षकहरू विभिन्न वडाहरू तथा टोलटोलमा पुगेर विद्यार्थी तथा अभिभावकसँग प्रत्यक्ष संवाद गरेका थिए। शिक्षकहरूले विद्यालयको उपलब्धि, शैक्षिक वातावरण र भर्ना सम्बन्धी जानकारी दिँदै अभिभावकहरूलाई आफ्ना बालबालिका विद्यालय भर्ना गराउन आह्वान गरेका थिए। स्थानीय अभिभावकहरूको सकारात्मक प्रतिक्रिया र अभिरुचिका कारण विद्यालयमा भर्ना संख्या उल्लेख्यरूपमा बढेको विद्यालय प्रशासनले जनाएको छ।
विद्यालयका प्रधानाध्यापकले बताएअनुसार, “हाम्रो विद्यालयले शिक्षा क्षेत्रमा निरन्तर गुणस्तरीयता कायम राख्दै आएको छ। आन्दोलन पछि पुनः विद्यालयको गति समातिएको र विद्यार्थी भर्ना अभियानमा शिक्षकहरूको सक्रियताले राम्रो परिणाम देखिएको छ।”
स्थानीय जनप्रतिनिधि र समाजसेवीहरूले पनि विद्यालयको यो पहलको प्रशंसा गरेका छन्। उनीहरूका अनुसार, यस किसिमको घरदैलो कार्यक्रमले समुदायमा शिक्षाको महत्व अझ बढाउन सहयोग पुग्नेछ।
विद्यालय प्रशासनले नयाँ सत्रमा अतिरिक्त पाठ्यक्रम गतिविधि, विज्ञान प्रयोगशाला विस्तार र सूचना प्रविधि शिक्षामा सुधारका कार्यक्रम पनि ल्याउने तयारी गरेको जानकारी दिएको छ।
