वीरगंज, जेठ ४
शसस्त्र प्रहरी बल नेपाल, पर्साले विशेष सूचनाका आधारमा छापामारी गर्दै झन्डै ७ लाख रुपैयाँ बराबरको अवैध कपडा बरामद गरेको छ।
२०७८ साल जेठ ४ गते, शसस्त्र प्रहरी बल नेपाल नं. १३ गण मुख्यालयअन्तर्गत प्रस्तावित सीमा सुरक्षा गुल्म वीरगंज र वीरगंज भन्सार कार्यालयबाट खटिएको संयुक्त टोलीले वीरगंज महानगरपालिका–१, छपकैया गाउँस्थित तीनवटा घरमा छापा मारेको थियो।
शसस्त्र प्रहरी नायब उपरीक्षक तथा सूचना अधिकारी देवेन्द्र बहादुर सिंहका अनुसार छापामारीका क्रममा भारतबाट भन्सार छली गरी चोरी पैठारी गरिएका र लुकाई छिपाई गोदाममा भण्डारण गरिएको ६ लाख ९८ हजार ८ सय रुपैयाँ बराबरको कपडा फेला परेको हो।
बरामद गरिएको कपडा आवश्यक कानुनी कारबाहीका लागि वीरगंज भन्सार कार्यालयमा बुझाइएको प्रहरीले जनाएको छ।
शसस्त्र प्रहरी बलका अनुसार यस प्रकारका अवैध क्रियाकलापहरू नियन्त्रण गर्न उनीहरूको सक्रियता अझै बढाइनेछ। सीमा क्षेत्रमा भइरहेको अवैध तस्करी नियन्त्रणमा सुरक्षा निकायको सक्रियता बढ्दै गएको सन्देश यस कारबाहीले दिएको छ।
