बीरगंज , बैशाख २५
बाराको दुधौरा खोला बाट अवैध रूपमा ढुङ्गा, गिट्टी तथा बालुवा संकलन भइरहेको अवस्थामा डिभिजन वन कार्यालय बारा ले एक जेसीबी र दुई वटा टिपर नियन्त्रणमा लिएको छ ।
डिभिजन वन कार्यालयबाट खटिएको गस्ती टोलीले बिहीबार दिउँसो करिब १२ः४५ बजे अवैध उत्खननमा प्रयोग भएका सवारीसाधन नियन्त्रणमा लिएको हो ।
राजेश कुमार साहको नेतृत्वमा खटिएको टोलीले कारबाही गरेको हो भने सुजित कुमार झाले अवैध उत्खनन तथा भण्डारणमा प्रयोग भएका सवारीसाधनमाथि आवश्यक कानुनी प्रक्रिया अघि बढाइएको जानकारी दिएका छन् ।
नियन्त्रणमा लिइएका टिपरमध्ये ना ७ ख ४८२५ र मधेश प्रदेश ०३–००१ क ३०११ नम्बरका सवारी रहेका छन् । गस्ती टोलीमा नागेन्द्र बैठासहित सुरक्षा निकाय र वनकर्मीहरूको सहभागिता रहेको थियो ।
वन कार्यालयका अनुसार जीतपुरसिमरा उपमहानगरपालिका–१ बाट नदिजन्य पदार्थ उत्खननको ठेक्का पाएको ठेकेदारले वन क्षेत्रभित्र नियमविपरीत घाटगद्दी सञ्चालन गर्नुका साथै वातावरणीय अध्ययन तथा परीक्षण प्रतिवेदनविपरीत उत्खनन गरेको पाइएको छ ।
सोही आधारमा नदिजन्य पदार्थ बोकेको सवारीसाधन नियन्त्रणमा लिइएको कार्यालयले जनाएको छ ।
डिभिजन वन कार्यालय बाराले प्राकृतिक स्रोतको अवैध दोहन रोक्न नियमित अनुगमन तथा गस्तीलाई अझ कडा बनाइने जनाएको छ ।
