काठमाडौँ स्वर्णलक्ष्मी सहकारी ठगी प्रकरणमा संलग्न रहेको आरोपमा राष्ट्रिय स्वतन्त्र पार्टीका सभापति तथा पूर्व गृहमन्त्री रवि लामिछानेलाई हिरासतमा राख्ने आदेश दिइएको छ । काठमाडौँ जिल्ला अदालतले थुनछेक बहस नसकिएपछि उनलाई हिरासतमा पठाउन निर्देशन दिएको हो । प्रहरीले थुनछेक बहसका लागि भोलि अदालतमा पुनः उपस्थित गराउने तयारी गरिरहेको छ ।
जिल्ला न्यायाधीश माधवप्रसाद अधिकारीको इजलासमा लामिछानेको बयान सम्पन्न भएको थियो । त्यसपछि उनलाई प्रहरीको जिम्मा लगाइएको हो । यसअघि, पोखरास्थित सूर्य दर्शन सहकारीको बचत रकम अपचलन मुद्दामा धरौटीमा रिहा भएका लामिछाने आज बिहान अदालतमा उपस्थित भएका थिए ।
काठमाडौँको कालीमाटीस्थित स्वर्णलक्ष्मी बहुउद्देश्यीय सहकारी संस्थाको रकम अपचलनको आरोपमा रवि लामिछानेसहित ३९ जना प्रतिवादी रहेको मुद्दा दर्ता भएको छ । प्रहरी अनुसन्धानअनुसार सहकारीको ५,६६९ जना बचतकर्ताको जम्मा २ अर्ब ६५ करोड ९५ लाख ५९ हजार ५८ रुपैयाँ अपचलन गरिएको तथ्य फेला परेको छ। यस प्रकरणमा ९३ वटा जाहेरी दर्ता भएका छन् ।
