वीरगञ्ज । पौष ४
निजी तथा आवासीय विद्यालय अर्गनाइजेसन नेपाल (प्याब्सन) वीरगञ्जको आयोजनामा जारी दोस्रो संस्करणको प्याब्सन छात्रा तथा जुनियर छात्र नकआउट क्रिकेट प्रतियोगिता अन्तर्गत एकै दिन पाँचवटा रोमाञ्चक खेल सम्पन्न भएका छन्।
प्याब्सन वीरगञ्जका सचिव अमित आलोकका अनुसार विद्यार्थीहरूमा खेलकुदप्रतिको रुचि अभिवृद्धि गर्नुका साथै शारीरिक तथा मानसिक विकासलाई प्रोत्साहन गर्ने उद्देश्यले प्रतियोगिता आयोजना गरिएको हो। विद्यालयस्तरमै खेलकुद संस्कृतिको विकास गर्न प्रतियोगिताले महत्वपूर्ण भूमिका खेल्ने विश्वास आयोजकले लिएको छ।
छात्रा तर्फको पहिलो खेलमा माउन्ट एडमन्ड र जीवन ज्योति स्कुलबीच प्रतिस्पर्धा भएको थियो। उक्त खेलमा माउन्ट एडमन्डले ९ विकेटको सहज जित हात पार्यो। उत्कृष्ट प्रदर्शन गरेकी स्मृति कुमारी भुलम प्लेयर अफ दि म्याच घोषित भइन्।
जुनियर छात्र तर्फको दोस्रो खेलमा अल्पाइन र माउन्ट मकालुबीचको प्रतिस्पर्धामा अल्पाइनले २९ रनको स्पष्ट जित निकाल्यो। अल्पाइनका अजद आलम उत्कृष्ट प्रदर्शनका कारण प्लेयर अफ दि म्याच बने।
छात्रा तर्फकै तेस्रो खेलमा गौतम र गुरुकुल आमनेसामने भएका थिए। खेलमा गौतम स्कुलले ६० रनको फराकिलो जित दर्ता गर्दै आफ्नो वर्चस्व देखायो। गौतमकी श्रेष्का बस्नेत प्लेयर अफ दि म्याच घोषित भइन्।
चौथो खेल छात्रा तर्फ अल्पाइन र एसआर ग्यालेक्सीबीच भएको थियो। कडा प्रतिस्पर्धापछि एसआर ग्यालेक्सीले ५ विकेटको जित निकाल्यो। यस खेलमा रागनी कुशवाहा उत्कृष्ट खेलाडी घोषित भइन्।
जुनियर छात्र तर्फको पाँचौँ खेलमा गौतम र गोल्डेन फ्युचरबीचको भिडन्तमा गोल्डेन फ्युचरले ७ विकेटको जित हासिल गर्यो। गोल्डेन फ्युचरका रेहान अन्सारी प्लेयर अफ दि म्याच बने।
आयोजकका अनुसार प्रतियोगिताले विद्यार्थीहरूमा अनुशासन, टिमवर्क र स्वस्थ प्रतिस्पर्धात्मक भावना विकास गर्न सहयोग पुग्ने अपेक्षा गरिएको छ। प्रतियोगिताका बाँकी खेलहरू आगामी दिनहरूमा निरन्तर सञ्चालन हुने प्याब्सन वीरगञ्जले जनाएको छ।
