वीरगञ्ज , असोज २०
नेपालमा सामाजिक रूपमा सीमान्तकृत तथा लामो समयदेखि जातीय विभेद र छुवाछुतको पीडा भोग्दै आएको डोम समुदायबाट पहिलो डाक्टर बन्न सफल सप्तरीको छिन्नमस्ता गाउँपालिका–२, रमपुराका **डा. दिनेश मरिक (डोम)**लाई वीरगञ्जमा आयोजित एक विशेष कार्यक्रमबीच सम्मान गरिएको छ।
कार्यक्रममा सांसद अमरेश कुमार सिंहले डा. मरिकलाई बधाई तथा सम्मान गर्दै उनको सफलता व्यक्तिगत उपलब्धिमा मात्र सीमित नरहेको बताए। उनले डा. मरिकले कठिन सामाजिक र आर्थिक परिस्थितिका बाबजुद हासिल गरेको उपलब्धि सीमान्तकृत समुदायका लागि प्रेरणाको विषय भएको उल्लेख गरे।
डा. मरिकले आफ्नो अध्ययनका क्रममा जातीय विभेदका कारण ६ पटकसम्म डेराबाट निकालिनुपरेको, विद्यालयमा सरस्वती पूजाको प्रसादसमेत छुन नदिइएको तथा चरम आर्थिक अभावको सामना गर्नुपरेको बताइएको छ। यस्ता कठिनाइलाई पार गर्दै चिकित्सा शिक्षा पूरा गरी डाक्टर बन्न सफल भएको उनको यात्रालाई सामाजिक विभेदविरुद्धको महत्वपूर्ण उदाहरणका रूपमा हेरिएको छ।
डा. मरिकको शैक्षिक यात्रामा सुरुदेखि नै अभिभावकीय भूमिका निर्वाह गर्दै सहयोग र छात्रवृत्तिका लागि पहल गरेका लेखक, पत्रकार तथा दलित अधिकारकर्मी भोला पासवानलाई समेत कार्यक्रममा विशेष धन्यवाद दिइएको छ।
प्रदेश सरकारदेखि विभिन्न निकायसम्म पहल गरी डा. मरिकका लागि छात्रवृत्ति तथा आर्थिक सहयोग जुटाउन पासवानले महत्वपूर्ण भूमिका खेलेको बताइएको छ। उनको निरन्तर पहलले आर्थिक रूपमा विपन्न विद्यार्थीलाई उच्च शिक्षा हासिल गर्न सहयोग पुगेको कार्यक्रममा उल्लेख गरिएको थियो।
कार्यक्रममा सांसद सिंहले आर्थिक अभाव र पहुँचको कमीका कारण डाक्टर तथा इन्जिनियर बन्ने सपना पूरा गर्न नसकिरहेका सीमान्तकृत तथा दलित समुदायका प्रतिभाशाली विद्यार्थीलाई लक्षित गरी विशेष छात्रवृत्ति तथा आर्थिक सहयोग कार्यक्रम ल्याउन सरकारसँग पहल गर्ने प्रतिबद्धता व्यक्त गरे।
“पैसा र पहुँचको अभावमा डाक्टर–इन्जिनियर बन्ने सपना गाँसमै सीमित हुन बाध्य सीमान्तकृत तथा दलित समुदायका जेहेन्दार विद्यार्थीका लागि लक्षित विशेष छात्रवृत्ति र आर्थिक सहयोग कार्यक्रम ल्याउन म सरकारसँग संसद् र सडक दुवैबाट जोडदार पहल गर्नेछु,” सांसद सिंहले भने।
डा. मरिकको सफलताले सामाजिक विभेद र आर्थिक अभावका बाबजुद शिक्षा तथा अवसर प्राप्त भए सीमान्तकृत समुदायका विद्यार्थीले पनि उच्च उपलब्धि हासिल गर्न सक्छन् भन्ने सन्देश दिएको सहभागीहरूले बताएका छन्।
