वीरगञ्ज , वैशाख २७
डुमरवाना विकास मञ्चद्वारा आयोजित प्रथम खुल्ला महिला भलिबल प्रतियोगिताको उपाधि जनशक्ति क्लब कोल्हवी बाराले जितेको छ।
प्रतियोगिताको फाइनल खेलमा जनशक्ति क्लब कोल्हवी बारा र लक्ष्मी नाथ क्लब हरिपुर सर्लाहीबीच प्रतिस्पर्धा भएको थियो। निकै रोमाञ्चक बनेको पाँच सेटको खेलमा सर्लाहीलाई पराजित गर्दै जनशक्ति क्लब कोल्हवी बारा च्याम्पियन बनेको हो।
उपाधिसँगै विजेता जनशक्ति क्लब कोल्हवी बाराले ३० हजार रुपैयाँ नगद, ट्रफी तथा मेडल प्राप्त गरेको छ। त्यसैगरी उपविजेता लक्ष्मी नाथ क्लब हरिपुर सर्लाहीले १५ हजार रुपैयाँ नगदसहित ट्रफी, मेडल तथा प्रमाणपत्र हासिल गरेको आयोजकले जनाएको छ।
प्रतियोगितामा उत्कृष्ट खेलाडीको उपाधि लक्ष्मी नाथ क्लब हरिपुर सर्लाहीकी नेहा चौधरी घोषित भइन्।
त्यसैगरी ‘बेस्ट स्पाइकर’ को उपाधि जनशक्ति क्लब कोल्हवी बाराकी कोपिला चौधरीले प्राप्त गरिन्।
प्रतियोगिताको समापन तथा फाइनल खेलको सभापतित्व डुमरवाना विकास मञ्चका अध्यक्ष गोविन्द चौधरीले गरेका थिए। कार्यक्रममा जितपुरसिमरा उपमहानगरपालिकाका उपमेयर भोला अधिकारी प्रमुख अतिथि रहेका थिए भने वडा नम्बर १३ का वडा अध्यक्ष हेमनारायण चौधरी विशिष्ट अतिथिका रूपमा उपस्थित थिए।
त्यसैगरी वडा नम्बर १६ की वडा अध्यक्ष चयन माया गुरुङ, समाजसेवी रूपलाल चौधरी तथा पलट चौधरीलगायतको विशेष उपस्थिति रहेको थियो।
कार्यक्रममा बोल्दै उपमेयर अधिकारी र वडा अध्यक्ष चौधरीले यस्ता खेलकुद प्रतियोगितालाई निरन्तरता दिन आवश्यक रहेको उल्लेख गर्दै आगामी वर्षहरूमा थप बजेट व्यवस्था गरी प्रतियोगिता अझ भव्य रूपमा सञ्चालन गर्नुपर्नेमा जोड दिएका थिए।
