वीरगञ्ज , पौष १
निजी तथा आवासीय विद्यालय सङ्गठन (प्याब्सन) वीरगञ्जको आयोजनामा दोस्रो संस्करणको ‘प्याब्सन गर्ल्स एन्ड जुनियर बोएज टी–१० नकआउट क्रिकेट टुर्नामेन्ट’ भोलि बुधबारदेखि सुरु हुने भएको छ । विद्यालयस्तरमै छात्रा तथा जुनियर छात्रलाई लक्षित गर्दै आयोजना गरिएको प्रतियोगिता आदर्शनगर रङ्गशालामा सञ्चालन हुनेछ ।
आयोजकका अनुसार प्रतियोगिताको उद्घाटन समारोह पुस २ गते बिहान ११ बजे हुने छ भने समापन पुस १६ गते गरिनेछ । मङ्गलबार आयोजित पत्रकार सम्मेलनमार्फत प्याब्सन वीरगञ्ज महानगर समितिले प्रतियोगिताको तयारी, उद्देश्य र संरचनाबारे जानकारी दिएको हो ।
टुर्नामेन्टमा वीरगञ्जका ३६ वटा प्याब्सन आबद्ध विद्यालयका टिमहरूले सहभागिता जनाउनेछन् । प्रतियोगितामा ३३६ जना छात्रा र ४३४ जना जुनियर छात्र गरी कुल ७७० जना खेलाडी प्रत्यक्ष रूपमा सहभागी हुने आयोजकले जनाएको छ ।
प्याब्सन वीरगञ्जका सचिव अमित आलोकले विद्यालय तहबाटै महिला क्रिकेटलाई प्रवर्द्धन गर्नु र बालबालिकालाई खेलकुदमार्फत शारीरिक, मानसिक तथा सामाजिक रूपमा सक्षम बनाउनु प्रतियोगिताको मुख्य उद्देश्य रहेको बताए ।
यस्तै, प्याब्सन वीरगञ्जका अध्यक्ष राहुल श्रीवास्तवले खेलकुदले विद्यार्थीमा अनुशासन, नेतृत्व, सहकार्य र टिमवर्कको भावना विकास गर्ने उल्लेख गर्दै त्यही लक्ष्यका साथ प्रतियोगिता आयोजना गरिएको बताए । गत वर्षको पहिलो संस्करण सफल भएपछि यस वर्ष थप उत्साहका साथ दोस्रो संस्करण आयोजना गरिएको उनको भनाइ छ । प्रतियोगिता सञ्चालनका लागि करिब ६ देखि ७ लाख रुपैयाँ खर्च अनुमान गरिएको र अधिकांश खर्च प्याब्सन वीरगञ्जले नै व्यहोरेको उनले जानकारी दिए । साथै, केही प्रायोजकहरूको सहयोग पनि प्राप्त भएको बताए ।
प्याब्सन वीरगञ्जका उपाध्यक्ष शर्मानन्द कुशवाहले प्रतियोगिताको सम्पूर्ण तयारी पूरा भइसकेको जानकारी दिँदै विद्यालयस्तरमै छात्रा क्रिकेटलाई केन्द्रमा राखेर आयोजना हुने यो कार्यक्रम देशमै उदाहरणीय रहेको दाबी गरे । भविष्यमा प्रतियोगितालाई अझ व्यवस्थित, व्यावसायिक र गुणस्तरीय बनाउने योजना रहेको उनले बताए । यसअघि सहभागी केही विद्यार्थीले राष्ट्रिय स्तरसम्म अवसर पाइसकेको तथ्यले प्रतियोगिताको महत्व पुष्टि गर्ने उनको भनाइ छ ।
टी–१० नकआउट ढाँचामा सञ्चालन हुने प्रतियोगिताले सीमित समयमा युवा खेलाडीलाई आफ्नो प्रतिभा देखाउने अवसर प्रदान गर्ने आयोजकको विश्वास छ । खेल भावना, निष्पक्षता र अनुशासनलाई उच्च प्राथमिकतामा राख्दै प्रतियोगिता सञ्चालन गरिने प्याब्सन वीरगञ्जले जनाएको छ ।
आयोजकले प्रतियोगिता सफल बनाउन विद्यालय, अभिभावक, शिक्षक, खेलप्रेमी तथा सञ्चारकर्मीहरूको सक्रिय सहयोगको अपेक्षा गरेको छ । विशेषतः छात्राहरूमा क्रिकेटप्रतिको बढ्दो आकर्षणलाई थप ऊर्जा दिन सञ्चार माध्यमको भूमिका महत्वपूर्ण हुने विश्वास व्यक्त गरिएको छ ।
